Cebuano News: Tinuig nga libreng pagpamakuna batok polio ug tipdas, gisugdan sa Bohol

Nagpaabot ang mga ginikanan og ilang mga anak sa ilang turno nga mabukunahan didto sa covered court sa Barangay Totolan sa lungsod sa Dauis niadtong Lunes, Pebrero 1, 2021 sa pagsugod sa tinuig nga libreng pagpamakuna batok sa sakit nga polio ug tipdas sa pakigtambayayong sa DOH isip parte sa supplemental vaccination program sa nasudnong kagamhanan batok sa maong mga sakit. (ecb/PIA-7/Bohol)

TAGBILARAN CITY, Feb. 3 (PIA) -- Gisugdan na ang tinuig nga libreng pagpamakuna batok sa sakit nga polio ug tipdas niadtong Lunes, Pebrero 1 sa mga lokal nga kagamhanan sa Bohol sa pakigtambayayong sa Department of Health (DOH) isip parte sa supplemental vaccination program sa nasudnong kagamhanan batok sa maong mga sakit.

Matud pa ni Assistant Provincial Health Officer Dr. Cesar Tomas Lopez nga ang maong mass vaccination program ipahigayon sa matag lungsod hangtod sa Pebrero 28, 2021.

Gi-awhag ni Lopez ang mga ginikanan sa pagpahimos niining libreng serbisyo ug pabakunahan ang ilang mga anak batok sa mga walay tambal nga sakit ug mahimong mosangpot sa mga komplikasyon.

“Kining tipdas ug polio wa ni siya tambal gyud. Kung ang bata maigo sa polio wa nay tambal na makapahiuli pa niya. There is no treatment mao na ang bugtong paagi sa pag-depensa, ang pagpangga sa atong mga kabataan pinaagi sa pagpamakuna,” matud pa ni Lopez.

Ang mga batang may edad siyam ka buwan ngadto sa lima ka tuig hatagan sa measles-rubella vaccine samtang ang may mga edad lima paubos bakunahan batok sa sakit nga polio.

Si Lopez nagkanayon nga ang kampanya sa supplemental vaccination sa nasod nababagan sa niaging tuig tungod sa mga quarantine measures nga gipatuman tungod sa COVID-19. Kini ang hinungdan sa paghinay sa mga paningkamot sa pagbakuna tungod sa mga gidili nga kalihokan nga nagbilin sa daghang mga bata nga wala nabakunahan batok sa maong mga sakit.

“Tungod aning pandemya, sa atong mga lockdown ug pagdili sa paglihok-lihol medyo mikunhod usab ang atong vaccination efforts sa atong nasud,” matud pa ni Lopez.

Giseguro sa opisyal sa panglawas ngadto sa mga ginikanan nga luwas ang mga bakuna diin gitumbok niini nga ang gobyerno nagatanyag sa libreng pagpamakuna sa mga niagi pang katuigan.

“Atong wad-on ang kahiwanga sa vaccination because sa akong giingon na sa niaging 40 ka tuig gasige na man og pamakuna ang atong gobyerno para sa mga kabataan nato,” pasabot pa ni Lopez.

Ang polio usa  ka virus nga dala sa poliovirus diin mahimo kining makaingon sa pagkabaldado, lisod sa pagginhawa ug pagkamatay.

Samtang ang tipdas usa  ka makatakod nga sakit dala sa virus nga moguba sa respiratory tract o agianan sa pagginhawa sa dili pa mokatap sa tibuok lawas. Mas daling matakdan niini ang mga masuso ug mga batang wala pa sa saktong edad tungod kay wala pa kaayo na-develop ang ilang immune system. (ecb/PIA7-Bohol)

Source: Philippines Information Agency (pia.gov.ph)