Cebuano News: COMELEC, gi-uswag ang oras sa pagparehistro sa mga bag-ong botante

TAGBILARAN CITY, Feb. 3 (PIA) -- Gi-uswag pa sa Commission on Elections (COMELEC) ang oras sa pagparehistro sa mga bag-ong botante.

Kini ang gipahibalo ni Commissioner Rowena Guanzon.

“Di na po 3 p.m. ang deadline. Makakaextend na po kami ng 5pm hangang 5:30,” matud pa sa pahayag ni Guanzon. 

Gipahibalo usab niini nga gi-aprobahan na usab sa commission en banc ang overtime pay sa mga kawani sa COMELEC.

Gipahayag usab ni Guanzon nga sugod karong buwan sa Pebrero, may voter’s registration na matag adlaw nga Sabado.

Pinaagi sa tweet, miingon si Guanzon nga ang maong lakang nga magpahigayon og voter’s registration matag adlaw nga Sabado base na usab sa hangyo sa mga indibidwal nga magdisi-otso na ug mga nagrabaho.

Tungod niini, miingon si Guanzon nga wala na’y rason o ‘excuse’ ang publiko aron dili makaparehistro.

Base sa labing ulahing datos, 1.17 milyong bag-ong botante pa lang ang nagparehistro gikan sa gibanabanang upat ka milyong dili pa rehistradong botante. (ecb/PIA7-Bohol)

Source: Philippines Information Agency (pia.gov.ph)