MISAMIS ORIENTAL, March 3--Malampusong giinagurahan ang duha ka Brgy. Road ug Riverside Protection sa lungsod sa Lagonglong, Misamis Oriental.
Mahimutang ang duha ka Provincial Roads sa Brgy. Tabok ug Brgy. Gaston, samtang sa Brgy. Talahiran Poblacion ang Riverside Protection kon Riprapping Phases 1 & 2 nga mokantidad tanan og P1,800,000.
Kini nga programa kabahin sa Barangay Empowerment Program ni Gobernador Bambi Emano nga naghatag og kahigayonan sa mga kabaranggayan aron maka-implementar og mga proyekto balor P300,00 matag tuig.
Ang mga kapitanes maoy gipapili sa Gobernador kon unsay ilang gusto nga proyekto kay sila man ang nasayod sa mga kakulangon diha sa ilang barangay.
Ubos sa liderato ni Gobernador Bambi sa pagpanguna sa Provincial Engineering Office (PEO) sa Misamis Oriental, nahatagan og katumanan ang mga proyektong giplano ug giugmad sa maong mga baranggay. Ug kon matibawas na ang maong mga proyekto, makahatag kini dugang kalambuan kanila ug mapahimuslan pa sa katawhan sa dapit.
Anaa sa maong kalihokan ang presensya nila Sangguniang Panlalawigan Board Members– Atty. Michele Anayron, Wayne Militante ug Frederick Khu kung asa mipadangat sa ilang mga mensahe pagdasig sa tanan nga kanunay silang paluyohan sa amahan sa lalawigan sa ilang mga tinguha.
Si Kapitan Elizar L. Dagala sa Brgy. Gaston sa Lagonglong human giinugarahan ang proyekto sa road concreting balor P300,000 mipaabot sa iyang dako nga pasalamat ngadto kang Gobernador Bambi gumikan pinaagi niining Provincial Road dili na maglisod ang mga lumulupyo sa ilang lugar nga mapaabot ilang mga produkto hilabina og gikan sa bukid nga bahin paingon sa sentro o kamerkaduhan.
“Daku kini uga ikatabang nga proyekto kanamo kay ma-concrete nani nga area, and karon ayahay na ang pag-agi sa mga katawhan. Daku kaayo gyud among pasalamat kay Gob. Bambi”, matud ni Kapitan Dagala.
Bisan si Kapitan Alven L. Bagongon sa Brgy. Tabok, Lagonglong naglaom nga posibleng daghan na ang makaabot nga business opportunities nga makasulod lakip sa ilang barangay tungod niining konkretong kadalanan nga proyekto balor P300,000.
Gipadangat sab niini iyang dako nga pagdayeg kang Gobernador Bambi gumikan wala kini mihunong sa pag-suporta gikan pa lang sa sinugdanan.
“Daku kaayo akong pasalamat sa Gobernador sa iyang walay puas nga suporta gikan pa sa road opening, road graveling hangtud na karon sa road concreting. Hinaot nga dili gyud mi nimo biyaan bisan pa man nga last term na nimo karon”, saysay ni Kapitan Bagongon.
Sa laing bahin, si Kapitan Nolan J. Sabucdalao sa Brgy. Poblacion sa maong lungsod dako ang kalipay nga ma-implementar ang ilang flood control project balor P1,200,000 aron nga mapangandaman ang kalit nga kalamidad sama sa pagbaha.
“Niini nga ayuda, mapangandaman namo ang flood control kon asa mao nga kini among gipokusan karon. Daku kaayo kini og tabang tungod kay mapugngan na ang posibleng perwisyo nga mahigauman kon ugaling adunay baha o lunop”, dugang ni Kapitan Sabucdalao.
Pasalig kanunay sa Gobernador nga mahatagan og katumanan ang unsa man nga hangyo sa kabarangayan kay iyang gipanumpaan sa iyang liderato nga hatagan og kaarangan ang tanang lumulupyo ug sama sa dipinisyon sa iyang pangalang 'Bambi' alang kaniya Bililhon Ang Matag Baryohanon Ipalambo. (PIO MisOr)
Source: Philippines Information Agency (pia.gov.ph)
0 Comments