KALIBO, Aklan, Marso 4 (PIA) – Waeo nga mga biktima it sunog sa isla it Boracay ku Nobyembre 25, 2020 ro nagbaton it sari-saring bulig halin sa gobyerno sa sangka simple nga seremonya it pagpanupod sa Session Room it Balabag Barangay Hall ku Marso 1, 2021.
Ro sari-saring bulig hay halin sa opisina it Presidente, kay Senador Bong Go ag sa Department of Social Welfare and Development (DSWD).
Ginpangunahan ro pagpanupod it bulig ni Bing Juaneza halin sa upisina ni Senador Bong Go sa pag-asister man nanday Barangay Balabag Kagawad Rufina Villaroman ag Marilou Sacapano nga nagrepresentar kay Punong Barangay Jason Talapian.
Ginhambae ni Juaneza sa mga resipyente nga ro pagtao it bulig hay pamaagi ni Presidente Rodrigo Duterte ag Senador Bong Go it pagpabatyag kanda nga owa sanda ginakalipati.
Bilang bulig ni Senador Go, ro mga nasunugan hay nagbaton it P2,000.00 nga kwarta, food packs, face masks, Jollibee meals, ag mga bitamina.
Waeo man nga mga gamit pareho ku “tablets,” nga daywang bilog, daywang pares it sapatos, daywang bisikleta, ag daywang relo ro ginpa “raffle” man sa mga resipyente. Ro mga gamit ngara hay halin man kay Senador Go.
Sa nasambit man nga aktibidad, nagpanupod man ro DSWD paagi kay Lluva Gallofin, Social Welfare and Development (SWAD) Team Leader, it P5,000.00 sa kada isaea sa mga biktima it sunog sa idaeum it programa nga Assistance to Individuals in Crisis Situation (AICS).
Suno kay Divina Malban, sambilog sa mga biktima it sunog, pagagamiton nana ro bulig-pinansyal halin kay Senador Go ag sa DSWD sa pagpaobra ku ana nga baeay ag i-kapital sa sangka maisot nga negosyo agud may ana nga kitaan.
Ro iba pang mga biktima nga sanday Rasel Sastre, Jeron Modragon, Joerlyn Gusi, Jeruld Modragon, Jenny Rose Sastre, Rommel Sastre ag Rigel Sastre hay nagpaabot man it kapareho nga plano sa pagkabaton nanda it bulig.
Nakaabot kay Senador Bong Go ro andang sitwasyon nga nasunugan it baeay sa tunga it pagpanaeasa it pandemya nga may sangkiri nga oportunidad nga makapangita bangud man sa pagsarado it kaabuaan sa mga establisimyento sa isla , paagi sa sangka sueat nga gapangayo it bulig para kanda nga ginpadaea ni Kagawad Marilou Sacapano.
Samtang, ro sambilog pa gid nga Boracaynon nga hataw-an man it bulig ni Senador Bong Go sa nasambit nga aktibidad hay si Gina Magbanua nga namatyan it nanay bangud sa mabuhay nga pagmasakit.
Ro habilin nga pitong putos it food packs nga may sueod nga bugas, delata ag noodles hay gintao eon lang kana eakip pa ro P1,000.00 nga bulig-pinansyal halin kay Senador Go. (JSC/VGV/PIA6 Aklan)
Source: Philippines Information Agency (pia.gov.ph)
0 Comments