Cebuano News: Lumba sa enduro sa Alicia adto sa TAPP sa Domingo

TAGBILARAN CITY, Bohol, March 3  (PIA) -- Agi og timaan sa opisyal nga pagbukas sa kalihukan sa turismo sa lungsod diin gikaintapan ang mga bungtod nga nahimong sentro sa extreme nga kalihukan sa sports, himoon karong Domingo Marso 7 ang kulba-hinam nga lumba sa motorsiklo nga enduro didto.

Gitawag nga The Alicia Panoramic Park (TAPP) Enduro Trail Challenge, lima ka kategorya sa lumba ang mahitabo, segun pa ni Municipal Tourism Officer Godelia Lumugdang.

PAKUSGANAY, KURSONADAHAY. Ang lumba sa Enduro sa Alicia, matud pa sa mga organizers, gisaad nga lingaw kay sa makapanalaw. Hinuon, kaymay lumba alang sa underbone, gilauman nga kini sayun apan nanginahanglan sa kahanas sa patungas ug padulhog sa mga kalibunan. (rahc/PIA7/Bohol) 

Buksan alang sa amateur ug propesyonal nga motorsiklista ang “3 man team 2 stroke,” o bahan sa tulo ka racers nga mogamit sa 2-stroke nga makina sa ilang motorsiklo ug bukas usab ang “3 man team 4 stroke, alang  sa mga dagkong motorsiklo nga pang trail sports.

Alang sa mga mas lig-on og tuhod ug mas ampay ang personal nga ginukdanay, bukas usab ang solo ultimate nga bukas alang sa propesyonal ug amateur, ug lain pa nga solo ultimate alang lamang sa mga amateur enduro sports enthusiasts.

Aduna usab lumba alang sa mga gagmay nga kategorya ang gikahinaman nga underbone, dugang ni Lumugdang.

Ang underbone, nagpasabot sa mga gagmay nga motor nga migamit sa tubo isip chassis ug kasagaran may mga makina nga gagmay og displacement.

Kalihukan nga gipasiugdahan sa Local Government of Alicia, Municipal Tourism Office, ang TAPP Enduro Trail Challenge giabagan usab sa local nga hugpong sa mga tigmotorsiklo nga gihinganlan og Bohol East Trail Bikers (BETB).

Ang BETB mao usab ang grupo nga mahimong marshals sa gukod sa Domingo pohon.

Ang Alicia, ubos ni Mayor Victoriano Torres III, giila na sa tibuok kalibutan sa mga trail runners nga usa sa mga labing nindot nga dagananan sa tibuok kalibutan, ug kini anaa sa TAPP.

Hinuon, sa pag-igo sa corona virus disease, tuyo nga gisirad-an ang mga trails sa TAPP aron usab makatabang ang lungsod sa pagpugong sa pagkatap sa sakit nga mahimong makamatay.

Alang sa mga buot mosalmot aron pruwebahan ang katakus sa lumba sa motorsiklo, ang rehistro anaa ra sa P130.00 ang matag kategorya, ug gani, kini nag-lakip na sa paniudto.

Samtang nagpadayon na ang registration didto sa Municipal Tourism Office sa Alicia, mahimo pa usab nga moparehistro didto sa Municipal Tourism office ug Human Resources Office didto mismo sa TAPP Tourism Outpost didto sa Alicia gikan sa alas 6:00 sa buntag ngadto sa alas 8:00 sa buntag sa adlaw sa lumba. (rahc/PIA7/Bohol)

Source: Philippines Information Agency (pia.gov.ph)