Cebuano News: Mga gobernador, mayor ug brgy chairman gisaka sa A4 priority list sa bakuna

TAGBILARAN CITY, March 26 (PIA) -- Gikumpirmar sa Department of the Interior and Local Government (DILG) nga gisaka na ang klasipikasyon sa priority list alang sa vaccination rollout sa gobyerno ang mga gobernador, mayor ug mga kapitan sa barangay.

Matud pa ni DILG Undersecretary Epimaco Densing III, gi-aprubahan sa Inter-Agency Task Force on Emer­ging Infectious Diseases (IATF-EID) ang ilang rekomendasyon kalabot niini.

“All 1,715 governors and mayors, and 42,046 barangay captains, ina­prubahan po natin na iangat po ang kanilang classification,” matud pa ni Densing.

Matud pa niini nga gikan sa kaniadtong B3 lamang, o other essential workers, naa na sa A4 karon ang mga nahisgotang lokal nga opisyal.

Ang A4 classification gilangkoban sa mga frontline personnel sa essential sectors, kauban ang mga uniformed personnel ug mga naa sa working sectors nga natumbok nga ‘essential’ o mahinungdanon sa panahon sa enhanced community quarantine (ECQ).

Base sa prioritization sa gobyerno, makadawat sila og bakuna batok sa COVID-19 human sa mga frontline health workers nga gikonsiderar nga A1; indigent senior citizens nga naa sa A2; ug ang nahabilin pang senior citizens ug persons with comorbidities nga naa sa A3 classification.

Samtang naapil sa A5 ang nahabilin pang indigent population ug kauban sa B1 ang mga magtutudlo ug social workers.

Kahinumdoman nga ning bag-o lang, unom ka mayor ang gimanduan sa DILG nga magpasabot human ni una sa pagpatopok og bakuna batok sa COVID-19. (ecb/PIA7-Bohol)

Source: Philippines Information Agency (pia.gov.ph)