Cebuano News: Licensure exam sa pipila ka propesyon, gi-reschedule sa PRC sa Oktubre

TAGBILARAN CITY, April 28 (PIA) -- Gi-oktaba sa Professional Regulation Commission (PRC) ang licensure examinations sa pipila ka propesyon.

Base sa pahibalo sa PRC, kini human sa anunsiyo sa Office of the President diin ipaubos sa Modified Enhanced Community Quarantine (MECQ) ang Metro Manila hangtod Abril 30.

Agi og pagsunod sa Resolution No. 1349, series of 2021, ibalhin ang 2021 Nutritionists ug Dietitians Licensure Examination (NDLE) sa Oktubre 17 ug 18, 2021.

Tungod niini, magsugod ang aplikasyon alang sa NDLE sa Hulyo 16, 2021 hangtod Setyembre 16, 2021.

Una nang gitakda ang pagpahigayon sa maong exam sa Agosto 9 ug 10.

Samtang base sa Resolution No. 1348, series of 2021, gi-reschedule usab ang 2021 Optometrists Licensure Examination (OLE) – Practical Phase sa Oktubre 18, 19, 20, ug 21, 2021.

Ipahigayon unta kini sa Abril 27, 28, 29, ug 30, 2021.

Kung may mga pangutana, mahimong magpadala og email sa Licensure Office sa licensure.division@prc.gov.ph ug licensure.office@prc.gov.ph. (ecb/PIA7-Bohol)

Source: Philippines Information Agency (pia.gov.ph)