Kinaray-a News: Antique nagapabilin nga malinong; rekord kang krimen nagnaba

SAN JOSE, Antique, Abril 5 (PIA) - -Ang probinsya kang Antique nagapabilin nga matawhay kag malinong kag nagnaba ang rekord kang krimen suno sa report kang otoridad kang ginhiwat ang Provincial Peace and Order Council (PPOC).

Si Police Major Frankie A. Gatila, Officer in Charge kang Police Operations Management Unit- Antique Police Provincial Office, nagreport kang PPOC meeting nga nagnaba ang nalista "crime incidents" sa una nga darwa ka bulan kang tuig 2021 kon i-komparar sa amo man nga binulan kang nagligad nga tuig.

The peacekeeping authorities attending the PPOC meeting

Kang tuig 2020 may "crime incidents" 194 para sa bulan kang Enero kag Pebrero samtang kang dya nag tuig may 165 lamang ukon nagnaba kang 14.95 porsyento.

Ugring ang PNP report kang pagtaan kang kaso nga "reckless imprudence resulting to injuries and damage to properties" nga ginakaumidan kang mga motor kag sarakyan nga nadisgrasya.

Tungod kadya, si Vice Governor Edgar Denosta nagproproner ka sangka ordinansa agud mapasigro ang proteksyon kang mga motorista kag mga nagagamit kang karsada ilabi na gid nga naglapad run ang kalabanan nga karsada sa probinsya.

Sa bahin kang kampanya kontra sa iligal nga droga ang PNP kag ang Philippine Drug Enforcement Agency (PDEA) nagreport kang anda ginpasanyog nga kampanya kontra sa iligal nga droga.

Gindugang report kang PDEA NGA sa 18 ka mga banwa anum (6) lamang kadya ang may gindesignar nga Balay Silangan para sa mga drug surrenderer.

Sa bahin kang Philippine Army, si 1Lt. Karl Maverick G. Peniero naghambal nga ang "army operations" padayon ilabi na gid sa mga lugar nga may ginreport nga gina-agyan kang mga "communist terrorist groups."

Samtang si Margie L Gadian, Provincial Consultant on Peace and Order and Public Safety, nagpanumdum sa mga ahensya nga nagapatuman kang Enhanced Community Integration Program sa pagpadasig ka pagproseso ka mga dokumento agud mabuligan ang mga katawhan nga nagsurender na sa gobyerno.

Ang Antique halin kang 2020 may 30 run ka mga katawhan nga nagbalik sa sabak kang gobyerno.

Ginhambalan man sa amo nga meeting ang mga programa kag lihuk kang Task Force ELCAC kag the Inter-Agency Task Force on COVID-19. (JBG/psm/PIA-Antique)

 

Source: Philippines Information Agency (pia.gov.ph)