MAASIN CITY, April 26 (PIA) -- Nagtagbo pagka adlawng Huwebes sa miaging semana ang mga representante ug heads of offices sa mga ahensiyang pribado ug publiko sakop sa Poverty Reduction, Livelihood, and Employment Cluster (PRLEC) nga gipangulohan sa buhatan sa TESDA Southern Leyte.
Gihimo ang meeting diha sa SJC audio visual room diin gitambongan usab kini ni Jason Calva, provincial administrator, isip mi represent ni Gov. Damian Mercado.
Sa maong meeting, si Jed Paolo Cairo, OIC sa TESDA-Southern Leyte, mibatbat sa reorientation sa LAMDAG project, ang pagpasuga sa mga wa pay kuryente nga mga panimalay sa tulo ka mga bukirang barangay sa siyudad, ang Bactul 1, Baugo, ug Matin-ao, gamit ang solar panels.
Kahinumdoman nga sa miaging bulan, Marso 22, mismo si Sec. Isidro Lapena, TESDA director-general, maoy nanguna paglusad sa Liwanag at Malasakit, Ramdam ang Asenso at Ginhawa (LAMRAG), terminong waray, didto sa Kuting Reef Resort.
Matud ni Cairo nga LAMDAG na ang ngalan niani karon aron mosibo sa binisaya, ang “ramdam” gipulihan og “dama.”
Gipasabot ni Cairo ang dakung panginahanglan aron molahutay ang programa para sa 63 ka pamilya nga mga beneficiaries sa tulo ka barangay, sanglit duna may kinutuban ang battery, solar panels, ug uban pang technical nga kahimanan.
Gikaigoan nga adunay ipahigayon nga livelihood programs, pinaagi sa DOLE ug uban pang ahensiya, aron matabangan ang beneficiaries pag-sustenir sa LAMDAG project, ug sa ingon nga paagi mokaylap kini sa ubang mga dapit sa probinsiya.
Ang PRLEC usa ka hut-ong sa mga pundok ilawom sa provincial task force-end local communist armed conflict. (ldl/mmp/PIA8-Southern Leyte)
Source: Philippines Information Agency (pia.gov.ph)
0 Comments