CORTES , Bohol, May 11 (PIA) -- Mikabat na sa 39 ka mga healthcare workers ug fontliners (HCW/frontliner) sa Bohol ang naangin diha nga natakdan sa coronavirus disease (COVID-19) samtang naningkamot sa pag-alagad sa mga masakiton.
Kini na ang labing daghan nga HCW nga naangin sa sakit nga mahimo unta nga dili sila hingtakdan kay makuhaan ang mga may kapasidad sa pag-atiman sa mga masakit.
Hinuon, sa susamang taho sa Bohol Inter Agency task Force on the management of Emerging Infectious Diseases (BIATF), niadtong Mayo 6, mikabat na sa 31,195 ka mga HCW ug frontliners ang kinatibuk-an nga natupokan na una ug ikaduha nga dose sa Sinovac ug sa Astrazeneca.
Gamit ang kasayuran nga gikan sa Provincial Health Office, gidugang sa BIAFT nga kinahanglan pa nga abton ang 17,545 ka mga nahibilin nga HCW ug frontliners aron makakuha sa bakuna ug kahatagan nag panalipod gikan sa pagtakod sa sakit.
Labing daghang HCW ang naangin didto sa Loon, diin 9 sila nga nasakit, sunod na ang 5 sa Tagbilaran. Upat usab ka HCW ang naagin sa Baclayon ug 3 ka HCW ang nasakit sa Dauis.
May tag duha ka HCW ang nasakit sa Valencia ug Talibon samtang may tagsa ka mga HCW ang nadamay sa Candijay, Bilar, Sevilla, Cortes, Balilihan, Panglao, Mabini, San Isidro, Dagohoy, Corella, Trinidad, Antequera, ug Pilar.
Kini samtang mikabat na sa 43 ka kinabuhi sa mga Bol-anon ang nabuhis tungod sa gika-intapan nga sakit; ang duha ka kamatayon nahitabo niining duha ka nagsunod nga mga adlaw.
Napakita sa labing bag-o nga COVID-19 Daily Case Map, nga gipagawas sa BIATF, Mayo 10, kini nga mga kasayuran nga padayon pa gihapon nga nagtug-an nga kinahanglang walay molugak sa pag-amping ug sa pagsunod sa minimum public health ug safety protocols batok niining nahisgutang sakit.
Sa nahisgutan nga adlaw, natala sa Bohol ang nagkaubos nga aktibong kaso diha nga may 12 na lang ka bag-ong kaso sa COVID nga nataho nianang adlawa, bisan kon 671 na ang kinatibuk-an nga aktibong kaso sa sakit nga hilabihan ka mananakod.
Sa kinatibuk-an nga 671 ka aktibong kaso sa COVID-19, 656 niini ang gikan sa local nga pagkatakod
Sa 671 ka kaso sa COVID, tulo niini ang nagagikan sa hanay sa namauli nga Pinoy nga gikan sa gawas sa nasud, mga namauli nga Pinoy nga natanggong sa pagpangsira sa mga lugar tungod sa pagpugong sa pagdagsang sa sakit, mga authorized persons outside residence (APOR) ug mga turista ug negosyante nga mianhi dinhi.
Sa nahisgutan nga adlaw, Tagbilaran pa gihapon ang may labing daghang kaso sa 165, sunod ang Dauis sa 58, Maribojoc sa 47, Bilar sa 32 ug Candijay sa 31. (rahc/PIA-7/Bohol)
Source: Philippines Information Agency (pia.gov.ph)
0 Comments