MAASIN CITY, May 28 (PIA) -- “Sa maayong balita na pud ta,” matud ni Maasin City Mayor Nacional Mercado sa iyang FB post dili pa lang dugay.
Sumala sa tahu ni Mayor Mercado, malipayon kaayo sila sa pagkahibalo nga ang siyudad sa Maasin og lungsod sa Macrohon, pulos sakop sa probinsiya sa Southern Leyte, nakakuha og positibo nga mga resulta gikan sa balidasyon sa Performance-Based Bonus sa tuig 2020.
Matud ni Mayor Mercado, ang Inter Agency Task Force on the Harmonization on the National Government Performance Monitoring, Information and Reporting System mao ang mihimo sa balidasyon sa mga dokumento sa lokal nga pangagamhanan sa siyudad sa Maasin.
Kini nagpasabot nga ang LGU sa Maasin City na-apil na sa mga listahan sa eligible Local Government Units on Performance Based Bonus alang sa tuig 2020, matud ni Mayor Mercado.
“Ipadayon ta sa paghatag og maayo, dekalidad og kinasing-kasing nga serbisyo publiko og sa pagsubay sa sakto nga pamahala sa atong LGU,” matud ni Mayor Mercado.
Samtang, ang lungsod sa Macrohon nakasunggit usab sa maong PBB alang sa 2020 sumala sa listahan sa pinili nga mga lokal nga pangagamhanan angayan sa maong pinasahi nga bonus. (ldl/esg/PIA SoLeyte)
Source: Philippines Information Agency (pia.gov.ph)
0 Comments