Cebuano News: SK sa Lila, learning aides sa mga module learners

PAGBUNTOG SA GITUIS NGA KASAYURAN. Sa Lila, ilabi na sa hisgutanan sa pagpabakuna, naghimo ang SK didto sa vaccine orientations aron mahatagan ang katawhan sa kasayuran kabahin sa kaayuhan sa pagpabakuna, taho ni SK Federated Chairperson Joyce Tagab. (PIA) 

TAGBILARAN CITY, Bohol, May 29 (PIA) -- Pagboluntaryo sa mga sakop sa Sangguniang Kabataan (SK) sa lungsod Lila isip mga learning aides sa mga kabataan nga magkat-on pinaagi sa modules apan walay ginikanan nga makagiya.

Kini maoy gipaambit ni Lila SK federated Chairperson Joyce Tagab, isip usa sa  ilang mga abag samtang ang mga tinugyanan sa kasanihan ug seguridad sa lungsod nagkamolo sa ilang gimbuhaton sa pagpugong nga ang lungsod masudlan sa dili na magawngan nga sakit.

Si SK federated Chairperson Tagab usa sa mga napili nga mainterview sa Presidential Communications Operations Office (PCOO) alang sa programa nga Network Briefing nga madungog sa tibuok nasud sa mga estasyonan sa radio ug telebisyon nga iya sa kagamhanan.

Sa Network Briefing niadtong Huwebes, mipasabut si Tagab nga una niya nga gitigum ang mga tsirman sa SK sa matag Barangay pinaagi sa Board of Trustees niini, aron sunahon kon unsa ang ilang ikatabang samtang ang pandemya naka-palta sa pisikal nga pag-eskwela sa mga magtutuon.

Atul sa tigum sa School Board sa lungsod, gipalanog usab ni Tagab ang ilang kabubut-on sa mga sakop sa SK sa pagtabang, samtang ilang gikasabot ang Association of Barangay Councils sa lungsod sa ilang dayag nga tanyag sa pagtabang pinaagi sa pagboluntaryo aron makagiya sa mga kabataan nga nanginahanglan og kaabag sa ilang pagtuon sa modules.

"Gusto lang pod mi nga mamahimong tulay  sa pagkat-on sa mga kabataan," saysay ni Tagab  ngadto kang PCOO Secretary Martin Andanar, niadtong Huwebes.

Sa hisgutanan sa pagpabakuna, matud ni Tagab nga alang sa mga kabatan-onan nga sakop sa mga nahauna nga bakunahan sanglit apil sa mga frontliners isip health workers ug volunteers, una nila gihmo ang orientations sa pagpabakuna.

Kini aron una nila nga masayran kon unsay buhaton ug mapaabut sa dili pa, sa panahon sa pagpabakuna ug sa human na sa pagpabakuna.

Tungod niini, nasayud na siya kon unsa ang iyang mapaabut kon mahuman na siya sa pagpabakuna.

Matud ni tagab, human sa lima ka oras gikan sa pagbakuna, gibati siya og pagpanugnaw, ug hilanat, apan wala na siya mahadlok kay sayud siya nga kini normal lamang kon ang bakuna mosulod na sa lawas.

Alang sa mga kaedad  niya ug mga kabatan-onan sa Lila, gipanawagan ni Tagab nga magpabilin pa gihapon sa pagpundo sa balay aron kalikayan ang pagtakod, ilabi na niining panahon nga ang pagpanakod, dili na gikan sa mga tawo nga gikan sa gawas sa Bohol. (rahc/PIA-7/Bohol)

Source: Philippines Information Agency (pia.gov.ph)