BAYOMBONG, Nueva Vizcaya, May 4 (PIA) - Naikkan tulong dagiti mannalon iti mais ti daytoy nga ili manipud iti Department of Agriculture(DA) itay napalabas a lawas.
Sigun kenni Municipal Agriculturist Paz Flores, 83 nga mannalon iti mais ti naikkan P3,000.00 tunggal maysa, bagas, karne iti manok, iklog ken daddumapay a taraon kas tulong kadagiti apektado ti COVID-19 a pandemya.
"Dakkel a tulong daytoy kadagiti umilitayo a mannalon gapu ta marigrigatanda iti madama nga pandemya iti COVID-19," kinuna ni Flores.
Dagiti mannalon nga naikkan tulong ket addaan maysa wenno nababbaba nga ektarya ti taltalunenna.
Inawis pay ni Flores dagiti daddumapay a mannalon tapno agparehistroda sadiay Municipal Agriculture Office(MAO) tapno maibilangda nga maikkan iti tulong nu adda manen ited iti DA.
Kinuna pay dagiti ofisyales ti LGU Bayombong nga adda iti sumaruno nga maited libre nga bin-i kadagiti mannalon daytoy upay nga panawen ti tudo.(MDCT/BME/PIA 2-Nueva Vizcaya)
Source: Philippines Information Agency (pia.gov.ph)
0 Comments