DILG nagkikinahanglan hin contact tracers

BORONGAN CITY, Setyembre 15 (PIA) – Iginpasamwak ni DILG Under Secretary  Jonathan Malaya nga adton mga nahigugma han ira nasud in bumulig nga tiwason na an COVID-19 pinaagi han pagiging contact tracer.

Usa daw nga game changer an contact tracing nga makakabulig paghuman han COVID-19.

Nagkikinahanglan daw hin contract tracers an gobyerno yana.

Segun han nahiuna nga pakighimangraw han DILG, iginpasabot nga an mga magigigng responsibilidad han contact tracers amo in: pagdumara hin interview, pagprofile ngan pagbuhat hin initial public health risk assessment han COVID-19 cases ngan han ira identified close contacts.

Sugad man ira igpapadara an mga contacts ha isolation facilities.

Kataliwan, kinahanglan pa nira dugangan an contact tracing ha pakipagsumpayan mga iba nga ahensya ngan private sector.

Ngan magbuhat hin daily monitoring han close ngan general contacts ha sakob hin 14 dias ngan iba pa nga buruhaton may paghisumpay han COVID-19 response.

Dinhi naman ha Borongan City, hi Ms. Gemma Amit, Local City Operations Officer in nagsumat nga maabot, 1, 473 nga contact tracers an kinahanglan han Eastern Visayas Region segun han report han Borongan City Information Office.

Mas damo daw an igpoposte nga contact tracers kun diin mas damo an kaso han COVID-19.

Ginpapatuman daw ini nga Contact Tracing Program ha ilarum han  “Bayanihan to Recover as One Act or Bayanihan 2 Law.”

Kinahanglan daw an aplikante in nahuman hin  Bachelor’s degree or college level ha mga kurso han medical  ngan criminology, komo an trabaho in nagkikinahanglan hin profiling, data gathering, research,  ngan documentation nga may investigative ability.

An suhol in maabot hin P18,784 kada bulan.

Samtang, ha paggawas naman ni Usec Malaya ha Public Briefing  han Setyembre 15, kinahanglan daw an applicant may-ada application form, PDS, NBI clearance ngan drug test.

Sumat ni Malaya an mga mag-a-apply in mahihimo kumadto ha pinakaharani nga DILG office o kun dire man ha ira mga online platforms. (PIA E. Samar with reports from Borongan City information Office)

Source: Philippines Information Agency (pia.gov.ph)