CEBU CITY, Oct. 16 (PIA) -- Kapin sa kapin 1.8 milyones na nga mga tinun-an na sa rehiyon VII ang ming-enroll sa mga tunghaan alang sa tuig 2020-2021, kini matud pa ni Salustiano Jimenez, ang Regional Director sa Department of Education (DepEd) sa Rehiyon 7.
Didto sa usa ka press conference sa ilang buhatan, niining bag-ohay pa lamang, matod pa ni Jimenez nga gani, kini 101.43 porsiyento na nga pagsaka, kon itandi sa gidaghanon sa mi-enroll sa miagi'ng school year.
"Dako na kaayong pag-usbaw [kon] ikumparar sa gihatag nato nga target nga 80 porsiyento labaw sa miagi'ng school year," dugang ni Jimenez.
Gani, segun pa sa opisyal sa DepEd, dako pa nga purohan nga mosaka pa kini tungod kay nagsige pa sila og pangdawat sa mga tinun-an, hangtud niining mga adlawa, usa ka semana human opisyal nga nagbukas ang school year.
Taho pa ni Jimenez nga malampuson ang pagpahahigayon sa pagbukas sa klase sa 19 ka mga divisions sa DepEd-7.
Matud pa, Wala sila'y nadawat nga mga reklamo o mulo gikan sa mga ginikanan sa unang semana sa pagbukas sa klase dinhi sa rehiyon.
Hinuon, sa mga pagbaha nga mi-apekto sa nagkalain-laing lugar sa rehiyon ug ang sunog sa Paknaan Elementary School sa Mandaue City nga mihatag og danyos tungod kay nanga-angin ang ubang modules, si Jiminez miingon nga sa kinatibuk-an, maayo pa gihapon ang tanan.
Ang DepEd-7 misulti nga wala silay nadawat nga mga opisyal nga mga mulo o problema kabahin sa mga sayop sa modules.
Subay niini, ubay sa mga taho nga gipakatap sa social media kabahin sa mga sayop-sayop kunohay sa modules, si Jimenez mihangyo sa publiko nga kon duna may kalapasan o sayop sa mga modules, mahimo nga ipadangat kini nila sa eksaktong hingtungdan ug dili ang pagpaka-ulaw diha sa social media.
Ang ilang buhatan, mao nay mohimo sa pagkorehi aron mahimo na nga tugma ang mga modules nga mugna sa mga magtutudlo subay usab sa most essential learning competencies (melcs).
Siya Jimenez mi-tambag usab sa mga ginikanan nga dili pugson ang mga tinun-an sa paghuman sa pagtubag sa mga modules nianang semanaha.
"Mahimo ra kining isumiter sa sunod nga semana. Ang importante, ang bata nakat-on," ingon pa sa director. (jsme/PIA7/Cebu)
Source: Philippines Information Agency (pia.gov.ph)
0 Comments